كراجات · تلميع · تظليل · مغاسل — أبوظبي والعين
عندك قراج والناس ما تعرف عنه؟ بنعبيه لك حجوزات. وإنت بس ترد على التلفون.
حنا نبني العرض، نصوّر الفيديوهات في محلك، نشغّل الإعلانات، ونرد على كل عميل خلال دقايق. فريق واحد، قروب واتساب واحد، مب أربع شركات.
مع نوردكس، ورشة مرسيدس في العين، من أول يوم فتحوا فيه.
- رخصة أبوظبي · CN-6225923
- أبوظبي والعين
- عربي وإنجليزي
- نتصل فيك خلال 5 دقايق
- فيديوهات · إعلانات · متابعة · فريق واحد
- نوردكس، العين — من أول يوم
المشكلة
ما تعبت من كل حملة إعلانية تسويها وما تييبلك نتايج؟
تدفع للمصمم. تدفع لميتا. وآخر الشهر محد ييي المحل.
- 01
مشاهدات بدون رسايل
الناس تشوف فيديوهاتك. وبعدين تكمّل سكرول.
- 02
رسايل بدون حجز
واحد يسأل عن السعر. الرد ييي متأخر. راح.
- 03
شغلك أحسن. وهم عندهم الزبايين.
الورشة اللي يمك شغلها أقل منك، وأغلى منك، وبعدها مليانة.
- 04
شركات تسويق تسولف
كل شركة تسويق تييك تسولف وتعطيك وعود. وبعدين محد يكون قد كلامه.
وش يتغير
بس ما عليك. الوضع بيتغير من اليوم.
تسويق القراج مب شي واحد. خمس أشياء مربوطة ببعض. أغلب الشركات تبيعك وحدة منهم، وإذا ما نفعت يقولون المشكلة منك.
- 01
العرض
شي واحد واضح تبيعه، بسعر يخلي صاحب المرسيدس يمسك التلفون.
- 02
الفيديوهات
نصوّرها في قراجك وبصوتك. سيايير حقيقية وشغل حقيقي، مب لقطات جاهزة.
- 03
الإعلانات
ميتا وقوقل، على منطقتك، ونراقبها كل يوم.
- 04
المتابعة
كل عميل يوصله رد خلال دقايق على الواتساب، عربي أو إنجليزي، وإنت تحت السيارة.
- 05
الحجوزات
تقويمك يتعبى. وإنت تسوي الشغل اللي تعرفه.
بكل اختصار: بنعبي محلك كله حجوزات.
وش تاخذ
وش نركّب لك في قراجك
أشياء تشوفها بعينك، مب كلام. كل اللي تحت نسويه لك حنا.
- فيديوهات قصيرة نصوّرها في محلك، كل شهر
- إعلانات ميتا وقوقل، ندير كل يوم
- متابعة واتساب ترد على العملاء خلال دقايق
- صفحة هبوط مبنية على عرضك
- أرقام أسبوعية: عملاء، تكلفة العميل، حجوزات
- فريق واحد وقروب واتساب واحد. مب أربع شركات.
الدليل
نوردكس. بدينا معاهم من أول ما فتحوا.
ورشة مرسيدس · العين · معانا من أول يوم
“بدينا معاهم من أول ما فتحوا، يبنالهم زبايين من الإمارات وعمان، ووفينا بوعدنا.”
- 01
الوضع
ورشة متخصصة بالمرسيدس في العين. شغل بمستوى الوكالة، قطع أصلية، وضمان سنة — وقراج يديد محد سمع عنه.
- 02
وش سوينا
بنينا العرض على «جودة الوكالة بدون أسعار الوكالة»، صوّرنا الفيديوهات في الورشة، شغّلنا الإعلانات، وردينا على كل عميل من أول دقيقة.
- 03
اليوم
يبنالهم زبايين من كل الإمارات ومن عمان يسوقون للعين عشانهم. ووفينا بوعدنا.
كيف نشتغل
ثلاث خطوات. وبس.
- 1
خل اسمك ورقمك
30 ثانية. بدون إيميل وبدون نماذج طويلة.
- 2
نتصل فيك خلال 5 دقايق
نسألك عن محلك ووش تحتاج. من 10 الصبح لـ 10 الليل.
- 3
احجز مكالمة النمو. واطلع بخطة.
100 درهم، 60 دقيقة، وخطة 90 يوم مكتوبة. طبقها بنفسك، أو خلنا نركّبها لك.
بصراحة
هذا مب لكل واحد.
- إذا تبا فيديو واحد رخيص وبس.
- إذا محد في محلك يرد على التلفون.
- إذا تبا نتايج بدون ما تغيّر عرضك.
- إذا تدور أرخص شركة تسويق في الإمارات.
إذا هذا إنت، ما عليك زود. وإذا لا، كمّل.
وعدنا
تطلع من مكالمة النمو بخطة مكتوبة. أو ما تدفع.
إذا وصلت آخر المكالمة وما عندك خطة 90 يوم مكتوبة لمحلك، قلنا قبل ما نسكّر ونرجع لك الـ 100 درهم. وفي التركيب، نظل نشتغل على فيديوهاتك لين ترضى عنها.
أسئلة
قبل ما تحجز.
هذا لمين؟
للكراجات وورش التلميع والـ PPF والتظليل والمغاسل في أبوظبي والعين. وصاحب القرار لازم يكون في المكالمة.
مكالمة النمو أونلاين؟
إي. على قوقل ميت أو فيديو واتساب، من 10 الصبح لـ 10 الليل بتوقيت الإمارات. عربي أو إنجليزي، على راحتك.
وش باخذ من مكالمة الـ 100 درهم؟
تشخيص لمحلك، إعلانات منافسينك قدامك، أرقام السوق في مجالك، وخطة 90 يوم مكتوبة تظل عندك سواء اشتغلت معانا أو لا.
تبيعون باقات؟
مب في هالصفحة. نسعّر بعد ما نفهم محلك. بيع باقة قبل ما نفهم هي نفس المشكلة اللي نحلها.
متى أشوف زبايين؟
الفيديوهات والإعلانات تنزل في أول أسابيع. وبعدين نعدّل كل أسبوع على أرقام حقيقية. ما نوعدك برقم قبل ما نسولف.
تقدرون بالعربي؟
إي. عربي خليجي أو إنجليزي، اللي يريحك. وهالصفحة مكتوبة بأيدينا، مب مترجمة.
خطوة وحدة
فشو تستنا؟
خل اسمك ورقمك. بنتصل فيك خلال 5 دقايق وبنرتّب لك خطة تعبي قراجك.
- نتصل فيك خلال 5 دقايق · من 10 الصبح لـ 10 الليل، بتوقيت الإمارات
- عربي وإنجليزي
تحياتي، فريق متنومس